На 07.12.2025 во Центарот за култура „Антон Панов“ во Струмица се одржа Свечена академија по повод три значајни јубилеи на Општинското основно училиште „Св. Кирил и Методиј“ од Дабиље – 160 години училиште на македонски народен јазик, 80 години образование на македонски литературен јазик и 65 години организирано основно образование.
Градоначалникот на општина Струмица, Петар Јанков, во своето обраќање упати голема благодарност до сите наставници, потенцирајќи ја важноста на нивната мисија. „Како што и нашите најголеми просветители Светите Кирил и Методиј, чии имиња гордо ги носи ова училиште, така и вие ја продолжувате нивната мисија – да го ширите знаењето, да го чувате јазикот, да ја будите љубопитноста и да ги водите новите генерации кон светлината на образованието“, кажа Јанков. Тој додаде дека наставниците се „херои на секоја генерација“, а на учениците им порача дека „се смислата на ова училиште и иднината што ќе се гради заедно“.
Градоначалникот истакна дека училиштето ќе продолжи да биде дом на вредности, знаење и напредок, а Општина Струмица ќе остане силен партнер во подобрување на условите за образование и поддршка на наставниците и учениците.
Директорот на училиштето, Васил Бубев, во своето обраќање посочи дека јубилеите не се само бројки, туку приказни, животи и генерации. „Тоа сме сите ние, собрани околу иста цел – создавање подобра иднина за нашите деца. Нека овој ден биде потсетник дека имаме обврска да продолжиме да градиме, да чуваме и да напредуваме со нови идеи, нова енергија и нови успеси“, рече Бубев.Познатиот фолклорист од Струмица, Иван Котев, во своето обраќање истакна дека јубилеите „обврзуваат и поврзуваат“ и дека овој свечен собир не е само сеќавање или час по историја, туку „вистинска историја – историја на едно време, на растеж и на поглед кон тоа каде сме биле и каде сме денес“. Тој ја нагласи долгата и тешка борба за слобода, независност и за правото на сопствен македонски мајчин збор.
Новинарката, поетеса и македонист, Сузана Мицева, родум од Дабиље и поранешна ученичка во училиштето, се обрати со емотивни зборови, нагласувајќи дека е голема чест да се говори за училиштето каде што започнала нејзината образовна приказна. Таа истакна дека секој се мери со времето во кое живее народ што со век и половина ја продолжува традицијата на училиште на свој мајчин јазик, додавајќи дека „го дишеме мекото слово на азбуката родено од трудот и духовната тишина на Светите Кирил и Методиј“.
Меѓу познатите личности кои учеле во оваа училиште се и браќата Миле и Ѓорги Барбаровски. Синоќа на свеченоста беше и Ѓорги Барбаровски, познат текстописец на најдобрите македонски новосозадени песни, меѓу кои и на безвременскиот хит „Заветна“ во интерпретација на Пепи Бафтировски, а на свеченоста тој пред публиката и ја запеја, која во еден глас пееше со него.
Свечената академија беше збогатена со музичка и рецитаторска програма во изведба на училишниот хор, солисти-инструменталисти и рецитатори од училиштето. Беа доделени и неколку благодарници, а свечениот дел го затворија инструменталистите Васил Атанасов В’чев (обоа), Катерина Гелебешева Костадиновска (пијано) и Влатко Митев (фолклорен тапан). По завршувањето, присутните имаа можност да ја погледнат и изложбата на ученички цртежи. /Р.Ѓ./
